ស្រីៗ បើមិនចង់ឱ្យប្ដីធុញទ្រាន់ និងទើសទាល់ចិត្ត ឈប់មានគំនិតសួរនាំរឿងទាំង ៣ យ៉ាងនេះទៀត
មនុស្សជាច្រើនគិតថា បើជាប្ដីប្រពន្ធ អាចនិយាយជាមួយគ្នាបានគ្រប់រឿង ពុំគួរមានរឿងលាក់លៀម បិទបាំងចំពោះគ្នានោះឡើយ។ ហើយក៏មានមនុស្សស្រីខ្លះគិតថា រាល់សំណួរដែលនាងសួរទៅប្ដី ស្វាមីត្រូវតែឆ្លើយតបប្រាប់នាងវិញទាំងអស់ តែយ៉ាងណាមិញ ស្ត្រីដែលឆ្លាត ពុំគួរសួរនាំប្ដីអំពីរឿងទាំង ៣ យ៉ាងខាងក្រោមនេះឡើយ បើមិនចង់ឱ្យទំនាក់ទំនងប្ដីប្រពន្ធមានបញ្ហា បើមិនចង់ឱ្យគ្រួសារត្រូវបែកបាក់។
១. ហាមសួរថា តើគាត់ស្រឡាញ់អ្នកឬអត់?
ក្នុងរឿងស្នេហា ប្រសិនបើបុរសម្នាក់ពិតជាស្រឡាញ់អ្នក គាត់នឹងបង្ហាញការស្រលាញ់ចំពោះអ្នកដោយទង្វើ និងកាយវិការ។ ដូច្នេះហើយ ស្ត្រីមិនចាំបាច់សួរប្តីថាស្រលាញ់ខ្លួនឬអត់នោះទេ។ ស្ត្រីត្រូវជឿជាក់លើខ្លួនឯង និងសេចក្តីស្រឡាញ់ដែលស្វាមីមានចំពោះអ្នក។ ការដែលអ្នកសួរសំណួរបែបនេះ វាបង្ហាញពីភាពអសន្តិសុខ និងការខ្វះទំនុកចិត្តលើស្នេហាដែលគាត់បានផ្ដល់ឱ្យអ្នក។
ស្ត្រីឆ្លាតដឹងពីរបៀបមានទំនុកចិត្ត និងគ្រប់គ្រងជីវិតរបស់ខ្លួន។ ពួកគេមិនខ្លាចបុរសចាកចេញ ឬឈប់ស្រឡាញ់នោះឡើយ។ ជំនួសឱ្យការសួរប្តីរបស់អ្នកថា តើគាត់ស្រលាញ់អ្នកទេ អ្នកគួរតែផ្តោតលើការស្រលាញ់ខ្លួនឯង មើលថែខ្លួនឯង និងបញ្ចេញភាពទាក់ទាញ បង្ហាញពីតម្លៃនៃខ្លួនអ្នក ដែលធ្វើឱ្យគាត់មានមោទកភាពចំពោះអ្នកវិញ។ ប្រសិនបើស្វាមីរបស់អ្នកពិតជាស្រឡាញ់អ្នក គាត់នឹងជម្នះរាល់ការលំបាក និងឧបសគ្គទាំងអស់ ដើម្បីកសាងគ្រួសារដ៏រីករាយជាមួយអ្នក។
២. ហាមសួរពីការចំណាយ ឬកាយចាយវាយរបស់គាត់
ដើម្បីមានសុភមង្គលក្នុងជីវិតអាពាហ៍ពិពាហ៍ជាមួយស្វាមី ភរិយាត្រូវជឿជាក់លើស្វាមី ហើយមិនគួរចង់ដឹងអំពីការចំណាយផ្ទាល់ខ្លួនរបស់គាត់ឡើយ។ ផ្ទុយទៅវិញ អ្នកគួរតែផ្តល់កន្លែងគ្រប់គ្រាន់ដល់ប្តីរបស់អ្នក ដើម្បីឱ្យគាត់មានអារម្មណ៍មានសេរីភាព និងសុខស្រួល។ ស្ត្រីឆ្លាតដឹងពីរបៀបគ្រប់គ្រងហិរញ្ញវត្ថុគ្រួសារឱ្យបានត្រឹមត្រូវ។ នៅក្នុងសេចក្ដីស្រឡាញ់ មនុស្សគ្រប់រូបត្រូវការភាពឯកជន ហើយអាពាហ៍ពិពាហ៍ក៏ដូចគ្នាដែរ។
បុរសត្រូវការលុយសម្រាប់ចាយវាយប្រចាំថ្ងៃ បំពេញតម្រូវការគ្រួសារ និងទិញអំណោយជូនភរិយា។ ទោះជាយ៉ាងណាក៏ដោយ ប្រសិនបើប្រពន្ធតែងតែសួរថា ប្ដីចំណាយលុយលើអ្វីខ្លះ ចាយទៅទីណាខ្លះ គាត់នឹងមានអារម្មណ៍មិនល្អឡើយ ហើយក៏យល់ថា នេះជាសម្ពាធមួយដែរ។
រឿងលុយកាក់អាចធ្វើឱ្យមនុស្សពីរនាក់ឈ្លោះគ្នាបាន។ លុយអាចជួយរក្សាទំនាក់ទំនងបាន ប៉ុន្តែវាក៏អាចធ្វើឱ្យមនុស្សពីរនាក់បែកគ្នាបានផងដែរ។ ដូច្នេះហើយ ស្ត្រីឆ្លាតនឹងប្រើលុយដើម្បីរក្សាស្នេហាក្នុងអាពាហ៍ពិពាហ៍ ផ្តល់ឱ្យប្តីនូវកន្លែងដាច់ដោយឡែក និងផ្ទះដែលមានស្ថិរភាព ដោយមិនចាំបាច់ព្រួយបារម្ភអំពីតម្លៃអាហារ និងសម្លៀកបំពាក់។
៣. ហាមសួរអំពីអាថ៌កំបាំងឯកជនរបស់គាត់
ក្នុងអាពាហ៍ពិពាហ៍ សូម្បីតែស្វាមីបើកចិត្តប៉ុនណា ក៏នៅតែចង់រក្សាអាថ៌កំបាំងឯកជនដដែល។ ក្នុងនាមជាភរិយា ស្ត្រីមិនគួរសួរនាំ ជីកឫសគល់ពីរឿងឯកជនរបស់ស្វាមីច្រើនឡើយ ប៉ុន្តែគួរទទួលស្គាល់ថាខ្លួនមិនល្អឥតខ្ចោះ ហើយជឿជាក់លើស្វាមីឱ្យបានច្រើន។
សុភមង្គលអាពាហ៍ពិពាហ៍ កើតចេញពីការទទួលយកអាថ៌កំបាំងរបស់គ្នាទៅវិញទៅមក ហើយមិនឆ្លៀតពេលចូលទៅរុករកអាថ៌កំបាំងទាំងនោះឡើយ។ ការទទួលយកបុរសដែលមិនល្អឥតខ្ចោះ នឹងជួយឱ្យសេចក្ដីស្រឡាញ់រវាងប្ដីប្រពន្ធ មានសេចក្ដីស្រឡាញ់ធំធេង និងស្ថិតស្ថេរយូរអង្វែង។
មនុស្សគ្រប់រូបសុទ្ធតែមានអាថ៌កំបាំងរៀងៗខ្លួន មិនថាបុរស និងស្ត្រី សូម្បីតែពេលរៀបការរួចក៏ដោយ។ អាថ៌កំបាំងខ្លះ បុរសនឹងរក្សាការសម្ងាត់ ដើម្បីកុំឱ្យប៉ះពាល់ដល់ទំនាក់ទំនងប្ដីប្រពន្ធ និងចៀសវាងធ្វើឱ្យប្រពន្ធយល់ខុស។ ទោះជាយ៉ាងណាក៏ដោយ នៅពេលដែលស្ត្រីយល់ និងទទួលយកបុរសដែលមិនល្អឥតខ្ចោះនោះ វានឹងក្លាយជាវិធីមួយដើម្បីដាស់សេចក្តីស្រឡាញ់ និងការទុកចិត្តរបស់បុរសក្នុងអាពាហ៍ពិពាហ៍៕
អត្ថបទ ៖ បរទេស / Knongsrok
Recent News
